მგფ–ი ფოთში 280 იძულებით გადაადგილებული ოჯახისთვის 7 ახალ კორპუსს აშენებს
საქართველოს მუნიციპალური განვითარების ფონდის აღმასრულებელი დირექტორის პირველმა მოადგილემ, ილია დარჩიაშვილმა, ფოთში მიმდინარე 7 საცხოვრებელი კორპუსის სამშენებლო სამუშაოები დაათვალიერა. საქართველოს მუნიციპალური განვითარების ფონდი, ევროკავშირის დაფინანსებით, ფოთის მუნიციპალიტეტში იძულებით გადაადგილებულ პირთათვის 7 ახალ საცხოვრებელ კორპუსს აშენებს. შვიდი ხუთსართულიანი კორპუსის მშენებლობისთვის, რომელშიც 280 იძულებით გადაადგილებული ოჯახი მიიღებს ბინას, ჯამში ევროკავშირის მიერ 9 180101.99 ლარია გამოყოფილი.
ფონდის დაკვეთით სამშენებლო სამუშაოები ყველა სტანდარტის დაცვით მიმდინარეობს. თითოეულ კორპუსში 40 ბინაა გათვალსიწინებული – 10 ერთოთახიანი, 30 ოროთახიანი. სულ შვიდივე კორპუსში 280 ბინა იქნება. შესაბამისად მშენებლობის დასრულების შემდეგ 280 დევნილ ოჯახს გადაეცემა საცხოვრებელი სახლის გასაღები.შენობა და გარე ინფრასტრუქტურა სრულად ადაპტირებულია შეზღუდული შესაძლებლობების მქონე პირებისთვის. ჯამში 280 ბინიდან 20 ბინა სწორედ შშმ პირებს გადაეცემათ. ბინების განაწილება საქართველოს ოკუპირებული ტერიტორიებიდან იძულებით გადაადგილებულ პირთა და განსახლების სამინისტროს კომპეტენციაა.
სამშენებლო სამუშაოებზე, რომელიც მეორე წელია მიმდინარეობს 350 ადამიანია დასაქმებული, საიდანაც 60% ადგილობრივი მოსახლეა.
საცხოვრებელი კორპუსების მშენებლობის ფარგლებში გათვალისწინებულია სახლების უზრუნველყოფა საინჟინრო კომუნიკაციებით. სახლების ჩაბარებისას ბინებში გაყვანილი იქნება გაზი, წყალი, ელექტროენერგია, გამართული იქნება საკანალიზაციო სისტემა. ყველა ოჯახში დამონტაჟდება: გამათბობელი სისტემა, ე.წ „ კარმა“, გაზქურა და წყლის გამათბობელი ავზი.
პროექტი ასევე ითვალისწინებს საცხოვრებელი კორპუსების მიმდებარე ტერიტორიის კეთილმოწყობას. დამონტაჟდება გარე განათება, ბავშვებისთვის გაკეთდება 2 სკვერი. თითოეულ კორპუსს ექნება საკუთარი ავტოსადგომი, პანდუსები, გზებზე დაიგება ასფალტ-ბეტონის საფარი, კეთილმოეწყობა ტროტუარები, გაიმართება სანიაღვრე სისტემები. შესაბამისად ახალი საცხოვრებელი კომპლექსი სრულად ითვალისწინებს და აკმაყოფილებს მოსახლეობის მოთხოვნებს. სამშენებლო სამუშაოებს სამშენებლო კომპანია შპს „ზიმო“ აწარმოებს. საქართველოს მუნიციპალური განვითარების ფონდი იძულებით გადაადგილებულ პირთათვის საცხოვრებელი სახლების მშენებლობას საქართველოს სხვა მუნიციპალიტეტებშიც აწარმოებს. დევნილებისთვის ღირსეული საცხოვრებელი პირობების შექმნა ფონდისთვის ერთ-ერთი მთავარი პრიორიტეტია.
