• მთავარი
•  /  სიახლეები

საქართველოს პრემიერ- მინისტრმა ირაკლი ღარიბაშვილმა,  რეგიონული განვითარებისა და ინფრასტრუქტურის მინისტრ დავით შავლიაშვილთან და შინაგან საქმეთა მინისტრ ვახტანგ გომელაურთან ერთად დაბა ასპინძაში დეპარტამენტის ახალი სტრუქტურული ქვედანაყოფი– სამცხე-ჯავახეთის სამხარეო განსაკუთრებულ დავალებათა სამმართველო გახსნა. შენობის რეაბილიტაცია რეგიონული განვითარებისა და ინფრაქტრუქტურის სამინისტროს მუნიციპალური განვითარების ფონდმა განახორციელა. გახსნის ღონისძიებას მინისტრებთან ერთად მუნიციპალური განვითარების ფონდის აღმასრულებელი დირექტორი ილია დარჩიაშვილი ესწრებოდა.

საზეიმო ცერემონიას შინაგან საქმეთა მინისტრისა და ინფრასტრუქტურის მინისტრის მოადგილეები,  განსაკუთრებულ დავალებათა დეპარტამენტისა და უწყების სხვა ხელმძღვანელი პირები, საქართველოს მთავრობის წევრები, ევროკავშირის დიპლომატიური კორპუსის, აშშ-ის საელჩოს წარმომადგენლები და სხვა ოფიციალური პირები დაესწრნენ.

შენობის გახსნასთან ერთად პრემიერ-მინისტრმა განსაკუთრებულ დავალებათა დეპარტამენტის პირად შემადგენლობას დაარსების 10 წლისთავი მიულოცა.

ასპინძაში შსს საგანგებო სიტუაციების ცენტრის შენობის  რეაბილიტაციის პროექტი სახელმწიფო ბიუჯეტიდან დაფინანსდა და მისი საერთო ღირებულება  4 276 291.97 ლარია.  პროექტის ფარგლებში 150- მდე ადამიანი დასაქმდა . საგანგებო სიტუაციების ცენტრის შენობის რეაბილიტაცია  2013 წელს დაიწყო და 2014 წლის ოქტომბერში დასრულდა.

პროექტის ფარგლებში მოხდა ძველი ადმინისტრაციული შენობის დემონტაჟი,  რომელიც მთლიანად ამორტიზირებული იყო.  სრულად შეიცვალა სახურავი;  გაილესა და შეიღება ფასადი;  გამოიცვალა კარ-ფანჯრები; დაიგო იატაკი და გაკეთდა ახალი ჭერი; ჩატარდა ლესვისა და სამღებრო სამუშაოები,; მოხდა კედლების დათბუნება და დამონტაჟდა გათბობის სისტემა;  გამოიცვალა ელექტროგაყვანილობა;  მოეწყო სიგნალიზაციისა და სავენტილაციო სისტემა,  ტერიტორიის მთლიან პერიმეტრზე დამონტაჟდა სათვალთვალო კამერები.

ძირითადი შენობის რეაბილიტაციის გარდა, პროექტის ფარგლებში აშენდა საკონტროლო გამშვები პუნქტის ახალი შენობა. ასევე აშენდა საქვაბე და დამონტაჟდა თბომომარაგების სისტემა. ამასთან, აშენდა როგორც დახურული, ისე ღია ტიპის ავტოსადგომები და ავტოსამრეცხაო. ტერიტორია მთლიანად შეიღობა ბეტონის საფასადო ბლოკით,  მოეწყო ხელოვნურსაფრიანი სათამაშო და სავარჯიშო მოედანი ,  ეზოში დაიგო ასფალტობეტონის საფარი.